هو ايه

بما اني ليا مزاج افضفض ... ممكن كلام مش مفهوم بس اي كلام تعبير عن حالة لغبطة متعايشة معاها بقالي اسبوع

اكتر من اسبوع؟؟؟ يمكن

بعيدة عنكم ومتقوقعة مش عارفة ليه

ممكن من جو التوتر اللي عايشاه بصورة عامة وراسي اللي ذكرت في موضع سابق اني عايزة ارميها شوية

يعني تتكرم وتتنازل عني حبة عشان اروق

الشغل حاسة بجو مشحون

كمان كام يوم تقييمي السنوي كالعادة وكل حياتي هناك مشاكل فالله اعلم هتقيم ازاي

كمان حاسة بحالة ملل

حالة انتظار داااااااائم لحاجة مش عارفة هي ايه وهتحصل ولا لأ

بصورة عامة مود متلخبط

هو انا هتجنن قريب؟؟؟؟؟

مفيش حاجة بعيدة في الزمن دا



....العواف

ستووووووووووووب ربع تهييس

الست هانم

هبة الله ترك

صاحبة الإنجازات العميقة

والصديقة الرقيقة

التي تستحق أن تطلع في تسعين دقيقة

وياريتني أستطيع أن أخبرها الحقيقة

أحببتك يا بُنيّة يا حلوة وفقيقة

واخترتك لمشاكلي وأفراحي رفيقة

بحبك منذ قلبي بالحب انكوى

وراح مني في دربي شريان الهوى

وراح عقلي فيكي يدوّر ع الدوا

ويارب نكون سوا

"بتصقفوا على أيه لسة مخلصتش "

ياهبه يا أم النوابغ وسلطانة الجموع

إلهي وانت جاهي ماتعرفكيش دموع

أألف فيكي مطلع أو اولع لك شموع

في كل عام بحبك يا شمسي والسطوع

ولو إني باهيّس واخر الليل كمان

لكنت عملت محشي وكلمت جيران

وقلت يا هوبة لازم نعيد أيام زمان

عشان الود يبقى في أوج العنفوان

وكوني كما تكوني يا أجمل ريسة

وحبك كارثة كبرى وجتني على المسا

ماقلت يا هوبة أصلي إيمان دي مهيسّة

وقد حذرت مرة .. معاكي ملبسة ؟

.......

إيمان - هانم - الميهي

"في حالة تهييس"

بمناسبة عيد ميلاد الآنسة الموقرة والصديقة المبجلة هبه - هانم- ترك

ما الهوانم لازم يجاملوا بعضهنّ

في العيد التاسع والعشرين لتوليها العرش على دماغنا

18-11-2009

:))

كل سنة وانتي طيبة وجميلة يا بوتا

ويارب نفضل صحاب ومع بعض طول العمر

وترجعي لنا بألف سلامة ياقمر

لأنك وحشتيني بجد وحقيقي

التليفون

بما ان ماحدش عاوز يهز طوله اقصد صوابعه ويكتب اي حاجه

قولت اكتب انا

وبما ان الذاكرة عندي بقت في الضياع بشكل مرضي يفقع

عاوزه كل واحده فيكم تحكيلي على اول مره كلمتني فيها على التليفون

كانت امتى وازاي؟..وقولنا ايه؟؟
في منكم فاكره اول مكالمه دي..بس طشاش كده اكنها حاجه من حلم قديم..

ف يعني..حسنه قليله تمنع بلاوي كتيره
ومن قدم شيء بيداه التقاه
ماعنديش اكتر من كده شحاته عشان تعبروني وتحكولي

يلا..مستنيه
ماتخلونيش اتحنط

عاوزه اعضها

بصوا بقى
بلا مقدمات بلا بتاع

كلكوا عارفيني طبعا
انا ااساسا مش هاقعد اكتب مين فين ليه

واصلا كمان مش داخله اعرف نفسي واقول كلام حلو والحركات دي
لأني اصلا في موود مش كويس
بس داخله كده عشان انا متغاظه من ايمان دي
لو اطووووولك بس

كل ده وبردو مش كفاية

يابنتي
أهدي كده وصلي ع النبي
انا برجع من شغلي الساعه 8 بليل وساعات 9 ونص
يادوب اكل حاجه وادخل انام من غير اي مقدمات
ولا حتى بفتح الميل ولا في وقت لأي حاجه

وحاولت كتير من الشغل ادخل هنا اكتب اي كوممنت ولا اكتب موضوع
ماعرفتش
اعمل ايه طيب؟؟
اصوت؟
اشد شعري؟
ولا ارد في البلوج بالحمام الزاجل؟

بوست خنيق انا عارفه
مش انتي قولتي اكتب اي حاجه؟
اديني كتبت اي حاجه
على ما النفسيه تتعدل (مش باينلها)
انا عارفه ان بردو مش هايعجبك
بس على الله تقولي حاجه
:@
هاقرمك

صباح الندالة

كلكو أندال أصلا وطز فيكم ع الهواء مباشرة واحدة واحده

محدش بيدخل ويكتب

وطز فيكم

يا عيال عايزين نتلم

وطز فيكم برضه

أنا زهقانة وخلوا عندكو دم

المهم

عايزين واحدة منكم جدعة تحط برنامج ليوم نقضيه كلنا سوا وواخدين بالكو من كلنا دي يكون محصلش ويخرج طاقات النكد من جوانا كلنا

مين قالت انا ؟؟

خصوصي أفندي خصوصي

ترن .. ترن

رقم غريب على هاتفنا

رديت: ألو

 ألو مساء الخير يا هانم

( يا فتاح يا عليم ع المسا .. واحد بيهزر )

مساء النور

منزل فلان الفلاني

أيوة

احنا مطعم ... يا هانم

( لا بجد الراجل ده بيهزر .. يكون خالو؟؟ اه بس خالو مسافر .. يمكن عمو مجدي .. حشوف كده )

أيوة

حضرتك كسبتي معانا طبق سلطة مجانا مع كل وجبة دليفري

( قول بقى انت مين بدل ما أقفشك )

تمام

والعرض لمدة أسبوع يا هانم

( شكلة بيتكلم بجد .. يا حلاوة .. كان نفسي من يوم ماتولدت حد يقولي يا هانم )

شكرا

شكرا يا هانم

( فرحت أوي انه ربنا حققلي أمنيتي .. يحيا المطعم )

دولسي جت يا بنات

ازيكو يا احلى بنات فى الدنيا انا جيت اهو و نورت البلوج فكره جامده جدا يا بيبو انك تجمعينا من تانى فى مكان واحد انا بحبك اوى اسمى داليا طبعا زى مانتو عارفين عندى 25 و لسه متجوزه من شهرين زى مانتو عارفين برضه ايه ده مش لاقيه حاجه جديده اقولها ربنا يخليكو و يسعدكو انا بحبكم اوى

أمنية لكل مواطن

حقول أمنيتي الخاصة ودعوتي لكل واحدة في العالم دول:

ورداية : ربنا يريح قلبك نفسي اشوفك مرتاحة أوييييييي

بوتا : يارب ترجعي مصر بقى .. وحشتيني

هورس : يارب تتجوزي واحد عنده عربية و طولة بال :))

ميرا : ربنا يسعدك واشوفك ماما

سمارت : ربنا ينورلك طريقك

دولسي : ربنا يسعد أيامك

نروش : يارب يديني طولة العمر واشوفك عاقلة وراسية كده

الباقيين بقى لما ييجوا :*))

وطبعا انا ربنا يخليني ليكو

.........

على فكرة

اسم بيبو ده عزيز عليا أوي عشان ببايا كان بيناديني بيه

وفيلم في شقة مصر الجديدة : شخصية غادة عادل كانت شبهي أوي أوي من سنتين كده وبيتهيألي لدلوقتي بس النسبة قلت حبة غير إن فكرة الفيلم نفسها أنا مؤمنة بيها جدا

أتمنى أكون قدرت أجاوب على استفسارات شعبي الحبيب

شكرا شكرا

لا داعي للتصفيق 

جيلي سعيد

بونسوار عليكم

النهاردة يشهد هذا اليوم بما ان الفيس بوك كان متقاطع وانا مش مدمنة دلوقتي غيره فكنت زهقانة... وسجل يا زمن دخلت المطبخ
كان نفسي في حاجة غريبة بصيت لقيت في جيلي .. قولت اتفرعن واعمله وخادتني الهمة فعلا نزلت الكاسات وحطيت البسكوت والفاكهة ووعملت الجيلي على امل اني اكله.. والله العظيم فاكرة ان كله كان مظبوط
ما علينا
البيت كله عرف اني عملت جيلي وانا عازماهم على عمايل ايديا على اساس يعني ان لما يجيلي مزاج بدخل اعمل حاجات دا مش كسل بس مزاج.. المهم حطيته الساعة 11 الصبح جيت على الضهر لقيته عايم.. قولت معلش استنى شوية يمكن التلاجة ضعيفة ولا حاجة
دلوقتي وفي هذا الوقت .. الساعة 9 بالليل فتحت تاني التلاجة وعندي امل انه ما يكسفنيش ويبيض وشي.. نسيت اقولكم قبل ما افتح التلاجة في التوقيت اللي هو الساعة 9 دا سألت بابا وماما .. ها يا حبايبي اجيبلكم الجيلي
الغلابة قالولي ماشي وهما منشكحين... فتحت التلاجة لقيت حالته زي ما كانت الساعة 11 الصبح...
انا بكره المطبخ دايما يسود وشي كدا ويحبطني
تفتكروا بقى السبب ايه.. والله العظيم مشيت على وصفة العلبة
دلوقتي انا اللي لبسته وعمالة اشرب فيه من الصبح لحد ما معدتي بقت عايمة في عصير جيلي
:@ :@ :@ :@

MeMo is HERE

انا اميرة " واللى يحبنى يقولى ميمو "ههههههههههههههههههه

23 سنه وشوية كده ..خريجة تربية فنية والحمدلله طبعا مأنتخة فى البيت ربنا يبعت بقى

بحب البنانيت اللى هنا اووووى وفى منهم ناس قريبين من قلبى اووى ;)) وهما عارفين نفسهم

مممممممممممممم مش بعرف اتكلم كتير .. مشكلة انا عارفه وبحاول على اد ما اقدر انى اتغلب عليها والحمدلله لحد دلوقتى معرفتش :))

المهم ان ما تزعلوش لو ما دخلتش كتبت كتير وكده

مش عارفه اقول ايه تانى غير انى ببقى مبسوطة اوووى وانا معاكو

ياااارب نفضل اصحاب على طووول

وكفاية عليكو كده :)))

هورس هنا يا بنات

صباحكو فل
انا هبه عندى 28 سنه او نقول 29 اوقع :)
اكبركوا سننا واكثركوا جنونا
واعز جدا اللى يقولي يا بيبو ههههههههه ماشي يا ايمان يا بيبووووو
او هورس باحب اوووووووووي الاسم دا
باحبكوا كلوكوا جدا
واتمنى اننا نكون مع بعض طول العمر اجدع صحاب
واسعد لمه
بوووووووووسه كبيره وحضن اكبر لكل واحده فيكو


وشكر خاص لبيبو على الفكره والتنفيذ

تيست..1 2 3..هنا الجيزه..سامعين؟

يسعد مساحكو

محدش يقولى يعنى ايه:D
علشان ده بوست لوحده
هههههههههههههه

مش عارفه ليه بصراحه بعرفكو بنفسي..اذا كان انتوا عارفين
مش انتو عارفين؟

ما علينا يمكن تبقى ناسين ولا حاجه
انا الاء..22 سنه
وعزباء..


وانا حاليا واقفه شويه

مش مع حد غريب..
مع نفسي

بنتحاسب..واللى هيطلع مديون هيدفع
:D

اشتات اشتوووووت

جود ايفينينج

تحدثكم هبة المنشاوي من امام الكومبيوتر

انا وبلا فخر ويا حسرتاه على مشارف ال 26 ودا عاملي هسهس لوحده

برج العقرب.. على الله يكون حد معترض

دارسة اقتصاد والشهادة متبروزة ولله الحمد.. بشتغل مساعد اداري في بنك ومحدش يسألني معناها ايه عشان هقتله

وفعلا انتوا اجدع اصحاب واقرب اصحاب لقلبي ووحشتوني اووووووووووووي اووووووووووي

ومش هقول بقى من اجدع واحدة فيكم عشان الضغائن.. بس حقيقي بحبكم كلكم اووووووووي وربنا ما يحرمكوش مني ياااارب :p

هناااا الكويت.. محافظة حولي " على اساس انها كبيرة يعني والفرق بين كل محافظة والتانية سفر" :D

السلام عليكم

هايات
اذيكونا
عملين ايه
كويسين
طب الحمد لله
انا مروه الحلواني
خريجة اداب اجتماع
وبحب العيال اصحابي دول اوي

السلام عليكم

أنا إسمي إيمان .. وأعز جدا اللي يقولي يا بيبو عشان ده اسم عزيز عليا .. مسلمة .. عندي 25 سنة وشوية .. برج الدلو .. بحب صحابي اللي هنا دول جدا .. من كل فتفوتة في قلبي .. أنا بكتب شعر عامي محصلش :) وبحب الترجمة وحلم حياتي أكون مذيعة راديو .. اللي عايز يعرفني يشوف فيلم " في شقة مصر الجديدة" لأنه يشبهني لحد كبير .. بحب اللون الأحمر .. ومرسى مطروح .. والبطاطس بالفراخ .. وكاظم الساهر .. ونفسي العالم كله يتملي أمانة ورفق :) أتمنى تقضوا وقت حلو معانا .. سلام