فاضل 8 ايام على عيد ميلادي
مش حاساه ابدا عيد... قلبي مجروح وموجوعة اوي
عارفين لما الواحد يعمل حاجات كتير كويسة ويلاقي قصادها اسوأ حاجة ممكن كان يتخيلها
ازاي ده يبقى المقابل؟؟؟؟؟
انا مؤمنة بإن كل شيء نصيب وقدر... وان الخير في اللي ربنا يحكم بيه
لكن لدلوقتي مش قادرة استوعب اللي فيه
لما تكوني راسمة حياة خلاص.. وبتتكلمي على مكان فرحك وشكله وهتعملي ازاي بيتك
وفي الآخر يبقى كله هواااا
جايز ناس هتقوللي الموضوع بيحصل كتير واني مش اول واحدة
صح
بس بالنسبالي الموضوع مختلف..و اول ضربة اصعب واقوى ضربة
وللأسف معنديش القوى الكافية اني انفض ده كله واقوم تاني وانسى
زي النهاردة كده السنة اللي فاتت .. كان بدأ كلام عن ارتباط
واكتر حاجة كانت مفرحاني .. ان الموضوع مكنش في بالي ابدا انه يحصل التوقيت ده لاني كنت لسة مخفتش من الحادثة
غير ان طريقة المعرفة كانت جميلة كأنها فيلم
وعلى فكر النهاية كمان كانت تشبه الفيلم
وامبارح عدى الفلانتاين من غير كل سنة وانا طيبة وكل سنة وهو معايا
سنة ضاعت كانت مجرد وهم
راسي تعبت من التفكير والهم
مش قادرة اشوف حد ولا اتعامل مع حد
مش طايقة سيرة عرسان او رجالة اصلا
بضحك وبهزر وببان جامدة لكن جوايا ربنا العالم
ومش عارفة بكتب الكلام ده ليه... يمكن عايزة افضفض
مش عشان اصعب على حد... بس عشان تدعولي من قلوبك بان ربنا يهونها عليا لاني بجد محتاجة الدعوة دي اوي
وانتوا اقرب ناس ليا ... وجايز عشان لما يعدي الوقت
اشوف الكلام ده وافتكر واضحك
مين عارف
هبه
